ഉള്ളിയേരി: അധ്യാപകനും സൈക്കിൾ സഞ്ചാരിയുമായ അഭിലാഷ് പുത്തഞ്ചേരിയുടെ ലഹരി വിരുദ്ധ സന്ദേശ സൈക്കിൾ യാത്രയ്ക്ക് പുത്തഞ്ചേരിയിൽ തുടക്കമായി . നാടിൻ്റെ സമാധാനവും, യുവതലമുറയുടെ ഭാവിയും തകർക്കുന്ന ലഹരി എന്ന മാരക വിപത്തിനെ തുടച്ചു നീക്കാനായി
കേരള സർക്കാർ ആവിഷ്കരിച്ച് നടപ്പിലാക്കിയ ഓപ്പറേഷൻ തൂഫാൻ ദ നാർക്കോ ഹണ്ട് എന്ന പദ്ധതിയെ പിന്തുണച്ചു കൊണ്ടാണ് സൈക്കിൾ സഞ്ചാരം. കോഴിക്കോട് ,മലപ്പുറം, തൃശൂർ, എറണാകുളം ,ആലപ്പുഴ ,കൊല്ലം എന്നീ ജില്ലകളിലൂടെ കടന്നുപോകുന്ന യാത്ര ഈ മാസം അവസാനത്തോടെ തിരുവനന്തപുരത്ത് സമാപിക്കും. ദുബായ് ആസ്ഥാനമായ സൂപ്പർമാർക്കറ്റ് ശൃംഖലയായ ബ്ലൂമാർട്ട് ഗ്രൂപ്പിൻ്റെ സ്പോൺസർഷിപ്പിലാണ് യാത്ര.
ബാലുശ്ശേരി എം.എൽ.എ വി . ടി സൂരജ് യാത്ര ഫ്ലാഗ് ഓഫ് ചെയ്ത് ഉദ്ഘാടനം നിർവഹിച്ചു .ഉള്ളിയേരി ഗ്രാമപഞ്ചായത്ത് പ്രസിഡണ്ട് പി. നാസർ ചടങ്ങിൽ അധ്യക്ഷത വഹിച്ചു. ഗ്രാമപഞ്ചായത്ത് മെമ്പർ വത്സൻ എടക്കാത്തിൽ സ്വാഗതം പറഞ്ഞു.
ബ്ലൂമാർട്ട് സി ഇ . ഒ . എൻ വി .അഷ്റഫ് , സുരേന്ദ്രൻ പുത്തഞ്ചേരി, ബ്ലോക്ക് മെമ്പർ സി അജിത , ശ്രീധരൻ ചാലൂർ , രാജൻ കേളോത്ത് ,ബാബു മണ്ണപ്പറമ്പത്ത് ,സജീവൻ പി കെ, ഷൈജു കാരയാട്ട്, രജീഷ് കനിയാനി എന്നിവർ ആശംസകളർപ്പിച്ച് സംസാരിച്ചു.
തിരൂർ കൽപകഞ്ചേരി ഗവ: വൊക്കേഷണൽ ഹയർ സെക്കൻഡറി സ്കൂളിലെ ചരിത്ര അദ്ധ്യാപകനാണ് അഭിലാഷ് പുത്തഞ്ചേരി . ശ്രീലങ്കയിലേക്ക് സൈക്കിൾ യാത്ര നടത്തി ശ്രദ്ധേയനാണ്.
About the Author
